काठमाडौँ ।
श्रम संस्कृति पार्टीका अध्यक्ष एवं सांसद हर्कराज राई (हर्क साम्पाङ) ले २०८२ चैत्र १९ गतेको प्रतिनिधि सभा बैठकमा राष्ट्रिय स्वाधीनता र शासकीय सुधारका मुद्दाहरूलाई सशक्त रूपमा उठाउनुभएको छ। बैठकलाई सम्बोधन गर्दै अध्यक्ष राईले देशको झण्डा, स्वाधीनता र असंलग्न परराष्ट्र नीतिको रक्षाका लागि एमसीसी (MCC) खारेज गर्नुपर्ने अडान राख्नुभयो।
शासकीय स्वरूप र पारदर्शितामा जोड
राजनीतिक स्थिरताका लागि अध्यक्ष राईले प्रत्यक्ष कार्यकारी प्रमुखको निर्वाचन प्रणाली लागू गर्नुपर्ने प्रस्ताव अघि सार्नुभएको छ। भ्रष्टाचार नियन्त्रणका लागि उहाँले संसद्मा कडा माग राख्दै भन्नुभयो, “अब सबै मन्त्री र सांसदहरूको सम्पत्ति अनिवार्य रूपमा छानबिन गरिनुपर्छ।” साथै, जेएनजी आन्दोलनका घटनाहरूको सत्यतथ्य बाहिर ल्याउन उच्चस्तरीय छानबिन समिति गठनको माग समेत उहाँले गर्नुभयो।
कृषि, शिक्षा र रोजगारीमा नयाँ कार्यदिशा
शिक्षालाई उत्पादन, निर्माण र आविष्कारसँग जोड्नुपर्ने धारणा राख्दै राईले प्रत्येक पालिकामा उद्योग र प्रत्येक परिवारमा रोजगारीको ग्यारेन्टी हुनुपर्ने बताउनुभयो। “कृषि समस्याको समाधान नगरी देशको आर्थिक विकास सम्भव छैन,” उहाँले भन्नुभयो। उहाँले प्राकृतिक स्रोत र साधनको अधिकतम सदुपयोग गरी देशलाई समृद्ध बनाउने नीति ल्याउन सरकारको ध्यानाकर्षण गराउनुभयो।
सीमा सुरक्षा र मानवीय सवालहरू
सांसद राईले सीमा सुरक्षालाई कडाइका साथ सुनिश्चित गरी यसलाई अन्तर्राष्ट्रिय मञ्चहरूमा उठाउनुपर्नेमा जोड दिनुभयो। यस्तै, वर्षौँदेखि ओझेलमा परेको भूतपूर्व गोर्खा सैनिकहरूको अधिकार र समान पेन्सनको मुद्दालाई राष्ट्रिय र अन्तर्राष्ट्रिय स्तरमा सम्बोधन गर्नुपर्ने उहाँको माग थियो।
समान विकास र नागरिकको आधारभूत अधिकार
काठमाडौँ उपत्यका बाहिर पनि समान विकासको अनुभूति हुनुपर्ने र विभेदको अन्त्य हुनुपर्ने बताउँदै उहाँले सुकुम्बासी व्यवस्थापन र आवासको अधिकार सुनिश्चित गर्न माग गर्नुभयो। वातावरण संरक्षण, प्रविधि विकास र शान्ति सुरक्षा कायम गर्दै जनताका आधारभूत सेवाहरूमा कुनै सम्झौता नगर्न समेत उहाँले आग्रह गर्नुभयो। नीति निर्माण गर्दा हतारमा निर्णय नगरी सबै पक्षसँग परामर्श गरेर मात्र अघि बढ्न उहाँले सरकारलाई सुझाव दिनुभयो।
प्रकाशित :- २०८२/१२/१९ बिहिवार ८:२० बेलुका
