धादिङ ,मार्पाक (राम्चे)
प्रतिनिधिसभा निर्वाचन अन्तर्गत धादिङ निर्वाचन क्षेत्र नम्बर–२ बाट राष्ट्रिय स्वतन्त्र पार्टी (रास्वपा) का उम्मेदवार बोध नारायण श्रेष्ठ विजयी भएका छन्। उनले आफ्नो निकटतम प्रतिस्पर्धी नेपाली कांग्रेसका रमेश धमला, नेपाली कम्युनिस्ट पार्टीका रामबहादुर भण्डारी तथा नेकपा एमालेका धनबहादुर घलेलाई पराजित गर्दै उल्लेखनीय मतसहित विजय हासिल गरेका हुन्।
यस जितसँगै धादिङ–२ ले एक अनुभवी, सक्रिय र विकासप्रति प्रतिबद्ध नेतृत्व पाएको भन्दै स्थानीयवासीहरूले आशा व्यक्त गरेका छन्। मतदाताहरूले अब यस क्षेत्रको समग्र विकास, पूर्वाधार विस्तार तथा जनजीवनसँग जोडिएका आधारभूत समस्याहरू समाधानतर्फ नयाँ सांसदले विशेष ध्यान दिनुहुनेछ भन्ने विश्वास व्यक्त गरेका छन्।
विशेषगरी नेत्रावती डबजोङ्ग गाउँपालिका–१ का स्थानीयवासीहरू विगत केही वर्षदेखि आधारभूत पूर्वाधार अभावका कारण अत्यन्तै कठिन परिस्थितिमा जीवन बिताइरहेका छन्। त्यहाँका बासिन्दाहरूको प्रमुख समस्या भनेको सडक तथा आवागमनको अभाव हो।
स्थानीयका अनुसार वडा नम्बर–१ अन्तर्गत पर्ने जिरी किलोदेखि राम्चे तर्फ जाने सडक नहुँदा गाउँलेहरू दैनिक जीवनका सामान्य कामकाज गर्न समेत ठूलो कठिनाइ भोगिरहेका छन्। घाँस, दाउरा, खेतीपाती तथा मेलापातका लागि जंगल र खेततर्फ जाँदा बाटो नहुँदा उनीहरू जोखिमपूर्ण बाटो हुँदै हिँड्न बाध्य छन्।
झनै वर्षायाममा समस्या झन् विकराल बन्छ। असार–साउनतिर सो क्षेत्रमा ठूलो पहिरो खस्ने क्रम नियमितजस्तै भएकाले आवागमन लगभग ठप्प हुने अवस्था आउने स्थानीयहरू बताउँछन्। यस्तो अवस्थामा गाउँमा कुनै आकस्मिक घटना वा दुःखद अवस्था—जस्तै कसैको मृत्यु भएमा समेत शवलाई घाटसम्म लैजान सक्ने सुरक्षित बाटो नहुँदा गाउँलेहरू चरम पीडामा पर्ने गरेका छन्।
“हामीले वर्षौँदेखि बाटोको अभाव झेल्दै आएका छौँ। सामान्य जीवन चलाउन पनि जोखिम मोलेर हिँड्नुपर्छ,” एक स्थानीयले दुःखेसो पोख्दै भने, “वर्षा लागेपछि त गाउँ मानौँ संसारबाटै टाढा परेको जस्तो हुन्छ।”
स्थानीयवासीहरूका अनुसार चुनावका बेला विभिन्न उम्मेदवारहरूले विकासका अनेक प्रतिबद्धता जनाए पनि सडकजस्तो आधारभूत आवश्यकता अझै पूरा हुन सकेको छैन। त्यसैले यसपटक जनताले दिएको मतलाई सम्झेर नव–निर्वाचित सांसदले सबै मतदातालाई समान दृष्टिले हेर्दै वास्तविक समस्या समाधानमा ध्यान दिनुपर्ने उनीहरूको अपेक्षा छ।
राम्चे क्षेत्रका बासिन्दाहरूले सांसद बोध नारायण श्रेष्ठलाई विशेष आग्रह गर्दै जिरी किलो–राम्चे सडक निर्माण तथा पहिरो नियन्त्रणका लागि दीर्घकालीन योजना ल्याउन माग गरेका छन्। उनीहरू भन्छन्—“हामीले दिएको मत केवल जितका लागि मात्र होइन, हाम्रो पीडा बुझ्ने र समाधान खोज्ने नेतृत्वका लागि हो।”
स्थानीयहरूले विकासमा कुनै प्रकारको पक्षपात नगरी भोट दिएका र नदिएका सबै नागरिकलाई समान व्यवहार गर्दै आधारभूत पूर्वाधार विस्तारमा ध्यान दिनुपर्ने बताएका छन्। विशेषगरी सडक निर्माण, पहिरो नियन्त्रण तथा सुरक्षित आवागमनको व्यवस्था गर्न सकेमा त्यसले स्थानीयहरूको जीवनस्तरमा ठूलो परिवर्तन ल्याउने विश्वास उनीहरूको छ।
जनताको भरोसा र आशालाई साथमा लिएर निर्वाचित भएका सांसद श्रेष्ठले धादिङ–२ भित्र रहेका यस्ता दुर्गम क्षेत्रका समस्यालाई प्राथमिकतामा राखी समाधानका लागि आवश्यक पहल गर्नेछन् भन्ने अपेक्षा स्थानीयवासीहरूको छ।
प्रकाशित २०८२/११/२५ सोमबार १०:३० बिहान
