काठमाडौँ, ५ चैत ।
राष्ट्रिय स्वतन्त्र पार्टी (रास्वपा) का सभापति रवि लामिछानेले नयाँ सांसदहरूले परम्परागत राजनीतिक शैलीभन्दा माथि उठेर जनताका मुद्दामा केन्द्रित हुनुपर्नेमा जोड दिनुभएको छ। रास्वपा संसदीय दलद्वारा आफ्ना सांसदहरूका लागि आयोजित दुई दिने ‘संसदीय अभ्यास र प्रक्रिया’ सम्बन्धी विशेष प्रशिक्षण कार्यक्रमको समापनका अवसरमा उहाँले यस्तो धारणा राख्नुभएको हो।
बुधबार सम्पन्न सो कार्यक्रमलाई सम्बोधन गर्दै सभापति लामिछानेले संसद् केवल भाषण गर्ने ठाउँ मात्र नभई कानुन निर्माण र जनसरोकारका विषयमा गहन बहस गर्ने थलो भएको उल्लेख गर्नुभयो। “जनताले धेरै ठूलो आशाका साथ हामीलाई यहाँ पठाएका छन्,” उहाँले भन्नुभयो, “हाम्रो उपस्थिति संसद्मा संख्याका लागि मात्र होइन, सार्थक परिवर्तनका लागि हुनुपर्छ।” उहाँले जनताको विश्वासलाई डगमगाउन नदिन सांसदहरू सधैं सचेत र अध्ययनशील रहनुपर्ने बताउनुभयो।
प्रशिक्षणका क्रममा लामिछानेले संसदीय मर्यादा, नियमावलीको पालना र शून्य समय तथा विशेष समयको प्रभावकारी सदुपयोग कसरी गर्ने भन्ने विषयमा आफ्ना अनुभवहरू समेत साटासाट गर्नुभएको थियो। उहाँले नयाँ सांसदहरूलाई सुझाव दिँदै भन्नुभयो, “सांसदहरूले अध्ययनमा बढी समय खर्चिनुपर्छ। विधेयकहरूमाथि दफावार छलफल गर्दा तथ्य र तथ्याङ्कमा आधारित भएर तर्क राख्न सके मात्रै हामीले सरकारलाई जवाफदेही बनाउन सक्छौँ।”
चैत ४ गतेदेखि सुरु भई दुई दिनसम्म सञ्चालित उक्त आन्तरिक प्रशिक्षणमा पार्टीका शीर्ष नेताहरूका साथै विभिन्न क्षेत्रका विज्ञहरूले संसदीय कार्यविधि, संसदीय समितिको भूमिका र बजेट निर्माण प्रक्रियाका प्राविधिक पक्षबारे सांसदहरूलाई प्रशिक्षित गरेका थिए। प्रशिक्षणमा रास्वपाका तर्फबाट संघीय संसद्मा प्रतिनिधित्व गर्ने सांसदहरूको पूर्ण उपस्थिति रहेको थियो।
प्रकाशित २०८२/१२/०५ बिहिबार ८:१४ बिहान
